WELL DI SHOW finally done. It did a gwaan so til mi did tink seh it naw badda stap. But mi affi tell di trute, me did a enjay di whole a it. All di eediat dem weh did com out to di audition dem. Bwoi mi still cyaa believe so ow much fool-fool people a run bout di place. Anyway, is entertainment an strange sells, so mek dem gwaan try dem luck an we cyan gwaan laugh when dem flap.
So, it did come down to Chris and Noddy, and bwai mi a tell yuh mi really did want di two a dem fi get it, cause as far as me concern di two a dem ready fi di video light, an Noddy ave fi im darkers a'ready. All me cyan seh is Digi mussi bade dis week, cause di mount a phone cyard weh mussi sell.
GOODBYE
Anyway, di two a dem supposen fi set, because ongle a ediat couldn' see seh dem two deh can turn star. Well since is di las week, mi decide fi talk bout all a di top ten, an who me tink cyan mek it.
Now mi affi tek di time fi tell Daynea goodbye. What a ooman cyan sing star. Anybody mus admit seh she coulda do more dan mek it as a star. Di girl ave class, an style and she jus well compose, but a so it go, everybody cyaa win. So, my girl jus gwaan res yuhself and teach di pickney dem, yuh still can mek it.
Now dough im get kick out long time, Natel im can gwaan, an di girls dem gwaan bad enough bout Q fi dem can mek it (bwoi young girl can love cute bwoi - an all four a dem nat even cute eida). Anyway mi naw fight, gainst dem 'cause dem affi eat to. Of course, yuh cyaa figet di one Prince J da bredda deh can more dan mek it. Di res a dem need fi wheel an come again an di likes of Shari can stay weh dem de.
So all mi affi seh is big up to all a dem who mek it to di tap, an nuh badda feel seh if a ongle likkle call credit yuh get, yuh show flap. Plus, memba seh if yuh sell di cyard dem, is more dan packet money yuh ennup wid (except maybe fi Q cause di credit affi share between di whole a dem).
Do
you have a problem? Is something bothering
you? Write to